<<    <     Sang Prabu Sane Ngrahayuang     2     >    >> 
Manusa Kaciptayang
16 Wenten cerita sujati saking Cakepan Sucine,
indik Sang Hyang Tunggal nyiptayang manusa lanang lan istri.
17 Sang Hyang Tunggal nyiptayang langit lan gumine nganggen sabdan Idane.
Salanturnyane Sang Hyang Tunggal nyiptayang manusa manut sekadi gambar praragan Idane.
Manusane punika,
kawangun saking tanah buk,
raris Sang Hyang Tunggal ngupin song irung manusane punika mangda dados urip.
Nah manusa kapertama sane kaciptayang Ida,
inggih punika anak lanang sane kawastanin “Adam.”
18 Raris Sang Hyang Tunggal nyiptayang taman sane kalintang luih.
Ring tamane punika makeh wenten punyan kayu sane wohnyane dados kaajeng.
Kenten pada,
Sang Hyang Tunggal nyiptayang kalih punyan kayu ring tengah-tengah tamane punika.
Sane kapertama,
punyan kayu sane ngicen urip.
Yening imanusa ngajeng saking woh-wohan punyan kayu punika,
ipun jagi urip salamin-laminne.
Sane kakalih punyan kayu sane ngicen mangda uning paindikan patut lan iwang.
19 Nah irika I Adam kagenahang Ida,
mangda ipun ngutsahayang lan miara tamane punika.
Irika raris Sang Hyang Tunggal masabda kapining imanusa,
20 “Makejang buah ane ada di tamane ene,
dadi daar cening.
Nanging buah ane di tengah-tengah tamane ento,
unduk buah ane ngamaang apang nawang unduk beneh lan pelih,
da cening naar.
Yening cening naar buahe ento,
pasti cening lakar mati.”
Kenten Sang Hyang Tunggal masabda,
yening manusane nglanggar prentah Idane,
pastika ipun jagi padem.
21 Nah kacerita mangkin,
Sang Hyang Tunggal masabda,
22 “Tusing melah anake muani ene padidiane.”
23 Raris Ida makta saluirin beburon ka arepan I Adam,
mangda ipun ngadanin saluirin beburone punika.
Nanging nenten wenten sane cocok kapining dewek ipune.
Irika raris I Adam punika kadadosang sirep aris olih Sang Hyang Tunggal.
Risampune ipun sirep aris,
Sang Hyang Tunggal ngambil tulang igan I Adame,
tur kadadosang anak istri.
Irika raris I Adam matangi saking sirepne,
raris mabaos,
24 “Beh,
ne suba anake ane paling cocok teken dewek tiange,
krana ia kawangun uli tulang tiange.”
25 Nah irika raris makakalih manusane punika urip ring tamane.
Lan ipun nenten mapengangge,
nanging nenten ja kimud.
Manusa Kaciptayang
Penuntun mabligbagan ring pasamuan:
1. Ngaturang penyuksma.
“Ngiring ja iraga ngaturang suksma mangkin. Semeton jagi ngaturang suksma indik napi?”
2. Ceritayang ja pakeweh semetone suang-suang raris iraga saling tunas icayang.
“Napike semeton wenten pakeweh mangkin?”
3. Ngwacen utawi mirengin paplajahane puniki.
4. Saurin ja pitakenne puniki:
“Napi sane plajahin iraga indik Sang Hyang Tunggal ring ceritane puniki?”
“Napi sane plajahin iraga indik manusa saking ceritane puniki?”
“Sekadi napike sapatutne iraga nyalanang idup manut pengajahane puniki?”
“Kapining sirake sapatutne iraga nyeritayang malih ceritane puniki?”